Ny Akademia nationaly dia ivo toerana iray ampitana ny kolokanto Sy Ny kolontsaina. Araka izany dia Miara miasa amin’ny mpampianatra, mpikaroka , mpahay tantara sy Mpanakanto anaty taranja maro ny ANAC. Mandray mpianatra manomboka 5 taona eoeo Misy ny fiofanana akademika mandritra ny taom-pianarana ampitana ny teoria sy ny tantaran’ny zavakanto omena ireo mpianatra rehetra, ary misy ihany koa mazava ho azy ny fampiharana na pratika. Ho fanazarana ny mpianatra ho sahy sy tia miseho sehatra, dia anatin’ny fandaharampotoan’ny ANAC ny fampisehoana ANAO NY SEHATRA isan-tapabolana andraisan’ny mpianatra rehetra anjara mavitrika mizara izay nianarany mandrampahavitany ny fanadinana.
Hafatra manokana
« Ny Akademia dia azo heverina ho toy ny rohy mampifandray ny kolontsaina nentim-paharazana sy ny fivoarana maoderina. Ao anatin’izany vina izany no ananganana ny Departemantan’ny Zavakanto Ara-pahitana (Arts Visuels), dingana lehibe entina hanamafisana ny andraikitry ny Akademia amin’ny fanavaozana sy ny famoronana.
Ity departemanta ity dia mandrakotra sehatra maro toy ny sarimihetsika (cinéma) sy ny mari-trano (architecture), ary misongadina amin’ny maha ivon-panandramana velona azy—sehatra iray mampifandray ny fahaiza-manao nentim-paharazana sy ny teknolojia maoderina.
Amin’ny maha ivon-toerana fikarohana sy fanavaozana anay, dia mikendry izahay ny hanofana sy hamolavola taranaka mpitarika sy matihanina, afaka mitondra sy mampivelatra ny indostrian’ny kolontsaina sy ny famoronana.
Ny tanjonay dia ny hanandratra ny fahaiza-mamorona ho hery manosika ny fampandrosoana sy ny famoronana asa, sady hanome lanja ny talenta malagasy ho mariky ny maha-izy azy sy ho fitaovana mampiroborobo ny “soft power”-ntsika, amin’ny alalan’ny fifanakalozana isam-paritra sy ny fisokafana amin’ny sehatra iraisam-pirenena. »
